நேரம் இருந்தால் படியுங்கள்

நேரம் இருந்தால்(முடிந்தால்) முழுவதையும் படியுங்கள்



எனது தாத்தாவிற்கு வயது சுமார் எழுபத்தைந்து அல்லது என்பது இருக்கலாம்.(கண்டிப்பாக என் தாத்தாவை மட்டும் சொல்லவில்லை என்பதை தெரிந்து கொள்ளவும்)

படிக்க வசதி இல்லாத காரணத்தால் சிறு வயதில்

அவருடைய தந்தை செய்த அந்த மானங்கெட்ட விவசாய பொழப்பை தேர்ந்தெடுத்தார்  …

இதோ வருடங்கள் உருண்டு ஓடிவிட்டன…..

ஓடிய வருடங்களில் அவர் நம்முடைய நாட்டிற்கு என்ன செய்திருக்கிறார் தெரியுமா..????

தன்னுடைய ஒரு ஏக்கர் விவசாய நிலத்தில்,  ஒரு போக விவசாயத்தின் மூலம் சுமார் 350 டன்னுக்கும் மேலாக நெல் உற்பத்தி செய்திருக்கிறார்…

(ஒரு போகத்திற்கு தண்ணீரும்,  உரம் வாங்க கடன் வாங்குவதுமே பெரும் பாடாகி விட்டதால்,  ஒரு போகத்திற்கு மேல் அவரால் விளைவிக்க முடியவில்லை..)

மேலும் இரண்டாம் போகமாய்  உளுந்து, எள், பயறு போன்ற தானியங்களை ஒரு குத்து மதிப்பாக சொன்னால் 100 டன்னுக்கும் மேலாக விளைவித்திருப்பார்..

சுமார் 400 டன்கள் தாவர, மிருக கழிவுகளை மறுசுழற்சி செய்து இயற்கை உரமாகவோ அல்லது வேறு உருப்படியான பொருளாக உபயோகித்திருக்கிறார்…

(அவரால் ஓசோன் படலத்தில் ஓட்டையோ ,  நீர், நிலம் மற்றும் காற்றோ மாசுபடவில்லை.)

வீட்டு வரி,  தண்ணி வரி,  வாய்தாவரி என்ற வகையில் இந்த நாட்டுக்கு அவர் கட்டிய வரிகளில்,  பின்னர் வருகின்ற (சந்ததியினர்)எங்களுக்கு

ஒரு மாடி வீட்டை கட்டி இருக்க முடியும்..

ஆனாலும் வரிகளை அவர் ஒழுங்காக கட்டிய பாவத்தால் ஒவ்வொரு மழை காலத்திலும் ஒழுகும் கூரையையும், ஓடுகளையும்  கூட நேரத்திற்கு அவரால் மாற்ற முடிந்ததில்லை…

அவரது தலையில் கட்டி இருக்கும் முண்டாசு முழுதாய் இருக்கும் பொழுது இடுப்பில் வேட்டி என்ற பெயரில் இருக்கும்…

அதுவே கந்தலாகி போனால் நீள நீளமாய் கிழிக்கப்பட்டு கோவணமாய் அவதாரமெடுக்கும்…

திருமணத்தின் போது கடனை வாங்கி தன்னுடைய மனைவி கழுத்தில் கட்டிய கால்பவுன் தங்கமும் அடகுக்கு போய் மூழ்கிவிட்டதால் மஞ்சள் கூட இழந்த கயிறு வெள்ளையாய் இளிக்கும்…

அவரது பாதுகாப்புக்கு ஒரு ரப்பர் செருப்பு கூட கிடைத்ததில்லை…

அன்றாடம் உடல் உழைத்து உழைத்து வேலை செய்வதாலும்,

உடல் இறுகி கல் போன்று இருப்பதாலும்,

நோய் இவரை கண்டு அஞ்சியதுண்டு

எனது பாட்டியோ எத்தனை குழந்தை பெற்றாலும் சுக பிரசவம் மட்டுமே…..

(மருத்துவமனை பற்றி பேசவில்லை)………..

அந்த பாவி(தாத்தா)யை பற்றி பேசி ஏன் நம் நேரத்தை  வீணடிக்க வேண்டும்..??

நமக்கு வேறு வேலை இருக்கிறது.

ரஜினி,  விஜய்,  அஜித் மற்றும் சூர்யா படத்திற்க்கு பெரிரிரிரிய்ய்ய்ய மாலை அணிவித்து , பாலாபிஷேகம் செய்ய வேண்டும்.

மானாட மயிலாட நிகழ்ச்சியை பார்க்க வேண்டும்.

நடிகைகளுக்கு கோயில் கட்ட வேண்டும்.

குத்து பாட்டுக்கு நடனம் ஆடும் சிறு குழந்தையை போற்றவேண்டும்.

கைது செய்யும் கட்சியை படம் பிடித்து காட்டி வன்முறையை தூண்ட வேண்டும்.

தீவிரவாதி என்று தெரிந்தும் அவனை எவ்வளவு செலவானாலும் பாதுகாக்க வேண்டும்.

கொலைவெறி பாடலுக்கு தேநீர் விருந்து தர வேண்டும்.

வெற்றி கோப்பையுடன்  வரும் மட்டை பந்து வீரர்களுக்கு தேநீர் விருந்தும், பணமும்,  பதவியும், பரிசுகளும் தர வேண்டும்.

பெண்கள் சூழ மத்தியில் வந்து கடன் வேண்டும் என்பவர்களுக்கு மந்திரி பதவி தர வேண்டும்.

இவர்களல்லவா இந்த நாட்டிற்காக உழைத்து உழைத்து ஓடாய் தேய்ந்திருக்கிறார்கள்..???